Kryetari i Bashkisë Korçë ka inspektuar laboratorin e ri të Shkollës “Themistokli Gërmenji”, që së bashku me 4 laboratorë informatike që po ndërtohen dhe 5 të tjerë që do të fillojnë nga puna përgjatë këtij viti, synojnë të zgjerojnë programin e madh të Teknologjisë dhe Inovacionit edhe në kurrikulat shkollore.

Shkolla e re “Themistokli Gërmenji” është një tjetër shkollë në qytetin e Korçës e transformuar rrënjësisht me standardet më të mira bashkëkohore, për 560 nxënës dhe mësues që e frekuentojnë atë.

Ka nisur puna për rikonstruksionin e Gjimnazit “Ymer Dishnica” në Korçë. Ky investim përfshin sistem ngrohjeje, termoizolim të godinës, dritare dhe dyer të reja, palestër të re, laboratorë të rinj, instalime elektrike dhe hidraulike, si edhe sistem kamerash brenda dhe jashtë godinës.

Kreu i Bashkisë Korçë së bashku me Ministren e Bujqësisë dhe Zhvillimit Rural Anila Denaj, deputetët Eni Zake dhe Iliri Pendavinji, si dhe prefektin Nertil Jole, inspektuan përfundimin e punimeve për mbrojtjen nga lumi Dunavec në Ravonik, me një investim prej 16 milionë lekë nga qeveria shqiptare.

Vazhdon puna për përmirësimin e kushteve infrastrukturore nëpër fshatra. U asfaltua rruga hyrëse për në fshatin Ravonik dhe gjithashtu u asfaltuan dy segmente rrugore brenda fshatit Barç. Puna do të vijojë në çdo Njësi Administrative për t'i kthyer kërkesat e banorëve në realitete të prekshme. 

Po ecën me hapa të shpejtë puna për konkretizimin e një prej projekteve më madhore të Bashkisë Korçë. Hapi i radhës ishte një takim me konsulentët e nënkontraktuar nga Kompania SOCAR, të cilët po vazhdojnë punën për hartimin e studimit të fizibilitetit, për t’i dhënë më tej një zgjidhje përfundimtare problemit të ngrohjes së qytetit, duke sjellë mundësi të shkëlqyera për industrinë, investitorët, punësimin dhe mbrojtjen e pyjeve.

Dy kabinete të reja dentare janë ngritur në shkollat 9-vjeçare "Sotir Gurra" dhe "Stavri Themeli". Viti i ri shkollor po afron dhe veç ambienteve komode fëmijët do të kenë mundësi të marrin edhe shërbimet e nevojshme dentare nëpër shkolla. Ky shërbim do të ofrohet edhe për nxënësit e shkollave të tjera në qytet dhe fshatra të Bashkisë Korçë.

I transformuar krejtësisht gjimnazi “Themistokli Gërmenji” në Korçë po bëhet gati për të pritur nxënësit në këtë vit të ri shkollor.

Aktualisht po punohet për sistemimin e ambienteve të jashtme, ndërkohë që ka përfunduar puna për rikonstruksionin e të gjitha ambienteve të brendshme. Nxënësit e kësaj shkolle së shpejti do të zhvillojnë mësimin në kushte shumë komode.

Ka filluar puna për sistemimin dhe rehabilitimin e rrugës që lidh fshatin Shipskë me Voskopojën. Ky është një projekt i cili do të lehtësojë qarkullimin e mjeteve midis këtyre dy fshatrave. Nëpërmjet projekteve të saj, bashkia synon të përmirësojë infrastrukturën rrugore në fshat dhe qytet.

Ka filluar puna për sistemimin dhe asfaltimin e tre segmenteve rrugore në brendësi të fshatit Bulgarec. Projekte të tjera do të realizohen në vazhdim për përmirësimin e infrastrukturës rrugore në çdo fshat të Bashkisë Korçë.