Kryebashkiaku Niko Peleshi ka vizituar bibliotekën e re të Shkollës 9-vjeçare “Sevasti Qiriazi”. Biblioteka e kësaj shkolle u mundësua në sajë të projektit të Bashkisë Korçë “Shkollat miqësore” të mundësuar nga UNICEF, i cili nxiti shkollat 9-vjeçare të qytetit të Korçës të hartonin projekte sociale në përputhje me nevojat konkrete të shkollës. 

Shkolla “Sevasti Qiriazi” fitoi shumën prej 300 mijë lekësh për ngritjen e bibliotekës në konkursin e zhvilluar mes shkollave të qytetit. Biblioteka tashmë ka rafte të rinj, skedarët e nevojshëm ku janë anëtarësuar të gjithë nxënësit e kësaj shkolle, dhe mjaft tituj të rinj që i vijnë në ndihmë programit mësimor. Kryetari i Bashkisë së Korçës Niko Peleshi e vlerësoi punën e bërë për ngritjen e kësaj biblioteke, duke e cilësuar një projekt interesant, të veçantë dhe mbi të gjitha një nevojë të shkollës, ndaj ajo duhet të mirëmbahet dhe mbi të gjitha të jetë më kreative, duke u shërbyer sa më mirë nevojave në rritje të fëmijëve.

Për të ardhmen, z. Peleshi premtoi se 46 mijë titujt e bibliotekës së qytetit, do të instalohen në kompjuterat e kësaj shkolle, e cila do të jetë një ndihmë e konsiderueshme për nxënësit, në gjetjen e titujve të nevojshëm.