Mblidhet sërish Këshilli i Rregullimit të Teritorrit pranë Bashkisë Korçë, pas mbledhjes së dështuar të disa ditëve më parë.

Menjëherë pas hyrjes në fuqi të vendimit negativ të Këshillit Bashkiak për rikonstruksionin e qendrës së Korçës, si dhe pas mbarimit të afatit të institucionit të Prefektit për t’u shprehur në lidhje me vendimin e Këshillit Bashkiak, Kryetari i  Bashkisë Korçë, Niko Peleshi,  thirri KRRT-në, për të vazhduar mbledhjen e  lënë përgjysëm nga hera e kaluar. 

Në mbledhjen e rradhës nuk ishin prezent përfaqësuesit e Agjensisë Rajonale të Mjedisit dhe as  përfaqësuesit e institucionit të Prefektit. 

Gjithsesi KRRT, e zhvilluar me mbi 50 % të anëtarëve, votoi me unanimitet të plotë,  lejën e ndërtimit për rikonstruksionin e dy rrugëve kryesore në qytet Bul. “Shën Gjergji” dhe bulevardi përgjatë Katedrales, si dhe lejën për sistemin e kanalizimeve në bulevardin kryesor përgjatë Katedrales, por edhe në Lagjet 1,2,3. 

Ndërtimi i sistemit të ri të kanalizimeve do t’i hapë rrugën më tej, rikonstruksionit të Bulevardit nga Kinema “Milenium”deri tek “City Center” dhe më tej rikonstruksionit total të rrugëve në Lagjet 1,2 dhe 3 të qytetit të Korçës. 

Bashkia Korçë, do të kërkojë në mbledhjen e rradhës të Këshillit Bashkiak, miratimin e fondit të investimeve në këto objekte, duke shpresuar në një vendimmarrje pozitive të këtij këshilli, duke e cilësuar këtë hap,  si fillimin e  punës për modernizimin e qendrës së qytetit të Korçës.