Kryetari i Bashkisë së Korçës Niko Peleshi, inspektoi punimet për shtrimin me kalldrëmin e ri të rrugëve në Lagjet 11 e 12 të qytetit të Korçës. Shtrimi i këtyre rrugëve po bëhet me një gur mjaft cilësor dhe më estetik krahasuar me disa nga rrugët e Lagjes 12 ku ky rikonstruksion ka përfunduar. 

Njëkohësisht është çelur fondi dhe është gati për të filluar puna për rikonstruksionin  e rrugëve në Lagjet 1,2,3. Por për këtë, bën të ditur Kryebashkiaku Peleshi, duhet të kalohet ngërçi i krijuar në Këshillin Bashkiak për investimet në qendrën e qytetit. Arsyeja është pasi pas shtrimit të kolektorit kryesor, rikonstruksioni do të fillojë nga qendra për të vazhduar në brendësi të lagjeve. Bashkia e qytetit, do të bëjë çdo përpjekje  për fillimin e investimit në kohë reale edhe në këto rrugë të qytetit, për të cilat fondi është i garantuar.