Në kuadër të projektit " Shkollat miqësore", komisioni i ngritur pranë Bashkisë Korçë, shpalli 3 shkollat fituese, të cilat aplikuan me projektet e tyre. Janë pikërisht Shkolla 9-vjeçare " Demokracia" me Projektin " Rrethim i shkollës dhe kend sportiv"; Shkolla 9-vjeçare "Ismail Qemali " me Projektin " Kend sportiv për shkollën" dhe Shkolla 9-vjeçare "Sevasti Qirjazi" me "Biblioteka miqesore".　
Projekti "Shkollat miqësore" është pjesë e programit "Qyteti për fëmijët", nëpërmjet të cilit Bashkia Korçë në partneritet me UNICEF synon të luajë një rol të rëndësishëm në edukimin dhe socializimin e fëmijëve në qytetin e Korçës.
Qëllimi i Bashkisë në kuadër të projektit "Shkollat Miqësore" është të inkurajojë aktorë socialë, individë, shkolla të qytetit për të marrë përgjegjësi për edukimin e fëmijëve dhe për ta bërë shkollën sa më miqësore.
Ky projekt　 targetoi shkollat publike 9-vjeçare të qytetit në mbështetje të inisiativativave që përmirësojnë cilësinë e jetës së fëmijëve në shkolla.
Gjatë muajit mars-prill përfundoi afati i aplikimeve, ku nga 11 shkolla aplikuese u përzgjodhën në një fazë të parë 5 prej tyre me projektet më të mira dhe në një fazë të dytë u përzgjodhën tre prej tyre. Procesi i selektimit u realizua nga një panel ekspertësh më përfaqësues nga Bashkia Korçë, DAR Korçë dhe OJF të rajonit. Granti i ofruar për secilën nga shkollat fituese është 300.000 lekë.