Vizioni i qytetit të Korçës në fokusin e planifikimit dhe zhvillimit urban, u prezantua në një takim të hapur me qytetarët të organizuar nga Bashkia e qytetit. Kryetari i Bashkisë së Korçës Niko Peleshi nënvizoi për të pranishmit rëndësinë e këtij takimi të hapur e të zgjeruar me të gjithë qytetarët, grupet e interesit dhe të gjithë ata që mendojnë që mund të kontribojnë për zhvillimin e qytetit.

Debati dhe rrahja e mendimeve merr një rëndësi të madhe në kushtet kur jemi duke hartuar Planin e Zhvillimit Urban të qytetit, i cili i është besuar një bashkëpunimi të gjerë mes Ministrisë së Punëve Publike, Transportit dhe Telekomunikacionit, Bankës Botërore, Konsorciumit "Lerman Architects and Town Planners Ltd", Thymio Papayannis & Associates Inc"dhe Qendrës për Kërkim dhe Zhvillim.

Gjatë takimit pati diskutime të ndryshme nga të pranishmit, të cilat do të studiohen me kujdes nga studioja projektuese deri në hartimin final të Planit Rregullues të qytetit të Korçës, i cili mendohet të jetë sa më jetëgjatë, duke i shërbyer të sotmes dhe të ardhmes së qytetit tonë.