Qyteti i Korçës ku tradita e veprës së artit gjen mishërimin më të mire të saj, është bërë mikpritëse e daltës së skulptorëve të vendit, rajonit e më gjerë. Përgjatë dy viteve 2008-2009, Bashkia e qytetit të Korçës ka pritur 16 skulptorë në Simpoziumin Ndërkombëtar " Skulptura e Parkut", të cilët i kanë dhuruar qytetit tonë 16 vepra të artit bashkëkohor në gur.

Ambjentet e gjelbëruara që nuk mungojnë dhe veçanerisht Parku "Rinia" ku janë përqëndruar më së shumti këto vepra të artit modern, tashmë janë më të vizitueshme nga qytetarët dhe vizitorët e huaj, pasi ato janë tani edhe më të dekoruara, më komode, më të këndshme pë syrin e gjithsecilit.　Skulpturat e vendosura në mjedise të ndryshme të këtij parku të gjelbëruar, janë tashmë pasuri e trashëgimisë kulturore të qytetit tonë.　

Në datat 25 qershor deri 6 korrik 2009, në qytetin e Korçës u zhvillua edicioni i dytë ndërkombëtar "Skulptura e Parkut - Korça 2009".　

Artistë të ardhur nga e gjithë bota, me një shtrirje gjeografike mjaft të madhe, Gjermania, Italia, Japonia, Egjipti, Britania e Madhe dhe Zelanda e Re, përgjatë dy javëve realizuan veprat e tyre në natyrë, tek Parku "Rinia". Projektet e skulptorëve pjesëmarrës u seleksionuan paraprakisht nga një juri ndërkombëtare, në konkursin elektronik të shpallur nga Bashkia e qytetit. Kanë qenë 80 projekte konkuruese prej të cilave u përzgjodhën vetëm 8.　

Ashtu si edhe vitin e kaluar, të gjitha veprat e skulptorëve u gdhendën dhe morën formë në natyrë tek Parku "Rina". Këto vepra kryesisht abstrakte, u realizuan në blloqe gurësh të bardhë, me dimensione të paracaktuara nga vetë artistët. Gjeografia e vendit të origjinës dhe të formimit artistik dhe kulturor të skulptorëve, u konkretizua në këto vepra të artit abstraksionist, të cilat përveç bukurisë estetike mbartin një miksim të historisë, simbolikës, misticizmit dhe traditës së popujve.　

Tashmë, 8 skulpturat e edicionit të dytë, u janë shtuar skulpturave të vitit të kaluar duke hijeshuar mjediset e parkut më të frekuentuar të qytetit. Bashkia Korçë është në rrugë të drejtë për të realizuar objektivin e saj kryesor, shndërrimin e Parkut "Rinia" në një galeri natyrore të artit modern.