Consorciumi izraelito –grek, të cilit i është besuar hartimi i Planit Rregullues të qytetit të Korçës, ka dorëzuar sot pranë Bashkisë së qytetit, dosjen e grupit të punës me analizën SWOT, e cila paraqet resurset dhe perspektivat mbi bazën e të cilave do të realizohet ky studim. Parashikohet që krahas diskutimeve me specialistët, për hartimin e Planit Rrregullues do të bëhet edhe konsultimi me qytetarët e Korçës. Ky plan parashikon zonimin funksional të të gjithë qytetit përfshi zonën e qendrës si edhe zonat informale të pastudiuara deri më sot.

Po kështu, studioja gjermane e cila po harton Masterplanin e Qendrës së Korcës po bashkëpunon ngushtë duke rakorduar punën me studion izraelite. Kryetari i Bashkisë Niko Peleshi e vlerësoi ecurinë e këtij procesi shumë të mire dhe vetë procesin si shumë të rëndësishëm për perspektivën e zhvillimit të qytetit tonë. Pas disa muajsh, Bashkia do të ketë në dorë Planin Rregullues të Korçës, i cili është një dokument shumë i rëndësishëm për qytetin, për një zhvillim të qëndrueshëm ekonomik dhe njerëzor të tij.